Ajnabi

Kaifi Azmi

ai hama-rang hama-nur hama-soz-o-gudaz

bazm-e-mahtab se aane ki zarurat kya thi

tu jahan thi usi jannat men nikharta tira ruup

is jahannam ko basane ki zarurat kya thi

ye khad-o-khal ye khvabon se tarasha hua jism

aur dil jis pe khad-o-khal ki narmi bhi nisar

khaar hi khaar sharare hi sharare hain yahan

aur tham tham ke utha paanv baharon ki bahar

tishnagi zahr bhi pi jaati hai amrit ki tarah

jaane kis jaam pe ruk jaae nigah-e-maasum

dubte dekha hai jin ankhon men mai-khana bhi

pyaas un ankhon ki bujhe ya na bujhe kya maalum

hain sabhi husn-parast ahl-e-nazar sahib-e-dil

koi ghar men koi mahfil men sajaega tujhe

tu faqat jism nahin sher bhi hai giit bhi hai

kaun ashkon ki ghani chhanv men gaega tujhe

tujh se ik dard ka rishta bhi hai bas pyaar nahin

apne anchal pe mujhe ashk baha lene de

tu jahan jaati hai jaa, rokne vaala main kaun

apne raste men magar shama jala lene de