Girah Lab Pe Jo Muddaa Ho Gaya

girah lab pe jo muddaa ho gaya

vo dil men mire aabla ho gaya

samajhte hain vo farz is ki shikast

mira dil bhi ahd-e-vafa ho gaya

kahun kya na dekhen jo meri taraf

taghaful sharik-e-haya ho gaya

vo karte hain sun kar sitam aur bhi

mira naala shukr-e-jafa ho gaya

qayamat hui us ki raftar se

ye hangama hangama-za ho gaya

bad-o-nek ka un pe kya e’tiraz

jo chaha kiya jo kiya ho gaya

shab-e-vasl hone ki hai ye dalil

shab-e-hijr se din siva ho gaya

asar sab khicha us ki guftar men

mira naala bhi na-rasa ho gaya

vo surat hai dilkash ki is zulm par

zamana tira mubtala ho gaya

mila de jigar ko bhi dil men khuda

ki ab shauq had se siva ho gaya

gham-o-ranj-o-hirman-o-andoh ko

mira siina mulk-e-baqa ho gaya

mohabbat men ilzam kya dil ko duun

ye gumrah tha mujh ko kya ho gaya

hujum-e-bala-ha-e-hijran na puchh

tujhe kya jo kuchh ho gaya ho gaya

anal-ishq kahna na aaya magar

ki mansur anal-haq-sara ho gaya

ye taqva javani men ‘salik’ magar

bure vaqt men parsa ho gaya

Leave a Comment