Yasmeen Habeeb
vo zaḳhm phir se hara hai nishan na tha jis ka
hui hai raat vo barish guman na tha jis ka
hava.en ḳhud use sahil pe la ke chhoḌ ga.iin
vo ek naav koi badban na tha jis ka
kashid karta raha hijraton se dard ki mai
koi to tha ki kahin ham-zaban na tha jis ka
isi ke dam se thi raunaq tamam basti men
ki ḳhanda-lab tha magar gham ayaan na tha jis ka
jali to yuun ki hua raakh ang ang mira
ajiib aag thi koi dhuan na tha jis ka
Leave a Reply