havadis ham-safar apne talatum ham-inan apna
zamana luuT sakta hai to luuTe karvan apna
nasim-e-sub.h se kya TuTta ḳhvab-e-giran apna
koi nadan bijli chhu ga.i hai ashiyan apna
hamen bhi dekh lo asar-e-manzil dekhne vaalo
kabhi ham ne bhi dekha tha ghubar-e-karvan apna
mizaj-e-husn par kya kya guzarta hai giran phir bhi
kisi ko aa hi jaata hai ḳhayal-e-na-gahan apna
azal se kar rahi hai zindagani tajrabe lekin
zamana aaj tak samjha nahin suud o ziyan apna
jamal-e-dost ko paiham bikharna hai sanvarna hai
mohabbat ne uThaya hai abhi parda kahan apna
hamesha sham.a bhaḌkegi sada paimana chhalkega
tiri mahfil men ham chhoḌ aa.e hain josh-e-bayan apna
Leave a Reply