Hashim Azimabadi
aaj kal bhes men leader ke hai shaitan samjha
magar is bhed ko hindu na musalman samjha
pairahan jism ke ham-rang tha us ke itna
koi malbus use samjha koi uryan samjha
gar yahi qadr-e-suḳhan hai to suḳhan par la.anat
ek qavval ko tu sha.ir-e-dauran samjha
ban ke mehman jo gaya ho gaya juuta gha.eb
mezbani ke na is raaz ko mehman samjha
jab hi us shoḳh ne puchha ki taḳhallus kya hai
dekh kar shakl miri mujh ko ghazal-ḳhvan samjha
baap tha us ka khaḌa dar pe magar ḳhair hui
ya.ani vo mujh ko gada main use darban samjha
us ke anchal men ghusa tha koi jugnu ‘hashim’
aur main us ko charagh-e-tah-e-daman samjha
Leave a Reply