apni palkon se us ke ishare uTha
us ki ungliyon se ishare uTha
aisa lagta hai dohra raha huun main kuchh
zindagi ke purane shumare uTha
raushni ka vo kaisa ajab shor tha
is kinare hua us kinare uTha
aḳhiri hai safar vo subuk-sar chale
us ke daman se apne sitare uTha
aankh ki us badan par lakiren khinchin
har ghazal se na.e isti.are uTha
guftugu manzaron ki tarah khul ke ho
ab na tashbih aur isti.are uTha
tera maqsad hai kya main samajh ja.unga
koi mausam hi ki baat pyare uTha
rang se rang milne na paa.e kahin
ek ek kar ke saare nazare uTha
jhiil patvar vapas na degi kabhi
apni kashti ab apne sahare uTha
aag ke ik qalam ki siyahi laga
jo dhuan ‘nur’ ganga kinare uTha
Leave a Reply