Syed Sarosh Asif
vye hijraton ka zamana bhi kya zamana hai
unhin se duur hain jin ke liye kamana hai
ḳhushi ye hai ki mire ghar se phone aaya hai
sitam ye hai ki mujhe ḳhairiyat batana hai
hamen ye baat bahut der men samajh aa.i
vahin to jaal bichha hai jahan bhi daana hai
hamen jala nahin sakti hai dhuup hijrat ki
hamare sar pe zarurat ka shamiyana hai
namaz eid ki paḌh kar main DhunDhta hi raha
kahin dikhe koi apna gale lagana hai
vahin vahin liye phirti hai gardish-e-dauran
jahan jahan bhi likha mera ab-o-dana hai
Leave a Reply