kyuun na le gulshan se baaj us arghavan-sima ka rang
gul se hai ḳhush-rang-tar us ke hina.i pa ka rang
jun-hi munh par se uTha di baagh men aa kar naqab
uḌ gaya rang-e-chaman dekh us ruḳh-e-zeba ka rang
sar pe dastar-e-basanti bar men jaama qurmuzi
khub gaya dil men hamare us gul-e-ra.ana ka rang
aaj saaqi dekh tu kya hai ajab rangin hua
surḳh mai kaali ghaTa aur sabz hai miina ka rang
de tu is abr-e-siyah men jaam jaldi se mujhe
dil bhara aata hai mera dekh kar sahba ka rang
jis taraf dekhun huun ab ‘bedar’ tere ashk se
ho raha hai surḳh yaksar daman-e-sahra ka rang
Leave a Reply