dast-e-munim miri mehnat ka kharidar sahi
koi din aur main rusva sar-e-bazar sahi
phir bhi kahlaunga avara-e-gesu-e-bahar
main tira dam-e-khizan laakh giraftar sahi
jast karta huun to lad jaati hai manzil se nazar
hail-e-rah koi aur bhi divar sahi
ghairat-e-sang hai saaqi ye gulu-e-tishna
tere paimane men jo mauj hai talvar sahi
main ne dekhi dekhi usi men gham-e-dauran ki jhalak
be-khabar rang-e-jahan se nigah-e-yar sahi
un se bichhde hue ‘majruh’ zamana guzra
ab bhi honton men vahi garmi-e-rukhsar sahi