fasil-e-sabr men rauzan banana chahti hai
sipah-e-taish mire dil ko Dhana chahti hai
lipaT lipaT ke shajar ko lubhana chahti hai
har ek bel mohabbat jatana chahti hai
riyal-e-ḳhvab luTati hai donon hathon se
amir-e-shauq mujhe azmana chahti hai
mira hi siina kushada hai chahaton ke ta.iin
tufang-e-dard mira hi nishana chahti hai
main apne aap ko bhi dekhne se qasir huun
ye sham-e-hijr mujhe kya dikhana chahti hai
khula ki sahil-e-dariya pe main pahunch hi gaya
to ye ana mujhe sahra men laana chahti hai
numu ko rok qalam ko lagam de ‘arshad’
ki ye ghazal tire parde uThana chahti hai
Leave a Reply