abbas-tabish

Ab Parindon Ki Yahan Naql-e-Makani Kam Hai

ab parindon ki yahan naql-e-makani kam hai

ham hain jis jhiil pe us jhiil men paani kam hai

ye jo main bhagta huun vaqt se aage aage

meri vahshat ke mutabiq ye ravani kam hai

de mujhe anjum-o-mahtab se aage ki khabar

mujh se faani ke liye alam-e-fani kam hai

gham ki talkhi mujhe nashsha nahin hone deti

ye ghalat hai ki tiri chiiz purani kam hai

ghaib ke baagh ka vo bhed khula hai mujh par

jis ka iblagh parindon ki zabani kam hai

hijr ko hausla aur vasl ko fursat darkar

ik mohabbat ke liye ek javani kam hai

itna mushkil to na tha gum-shudagan ka milna

ham ne ai dasht tiri khaak hi chhani kam hai

is samay maut ki khushbu ke muqabil ‘tabish’

kisi angan men khili rat-ki-rani kam hai

More Poems

Leave a Comment