ab to aksar ye sochti huun main
kya tire dil men vaqai huun main
shahr-e-maftuha dekh hasrat se
tujh ko sarhad se dekhti huun main
muflisi dekhti hai kya aise
teri tasvir bhi rahi huun main
vaqt-e-akhir men milne vaale shakhs
tujh ko sadiyon se janti huun main
mere mathe ki shiknen janti hain
kis qadar tujh ko sochti huun main
ratjagon se bhare hue ai shakhs
teri ankhon men jagti huun main
Leave a Reply