Shahid Kamal
zaḳhm-e-jigar ko dast-e-jarahat se puchhiye
jo rah ga.i dilon men vo hasrat se puchhiye
jan-dadgan-e-aish ka anjam kya hua
avargan-e-kucha-e-vahshat se puchhiye
main kho gaya huun apni zarurat ki bhiiḌ men
main kya huun mujh ko meri zarurat se puchhiye
afsos hai mujhe miri ghairat ki maut par
kyuun ki hai ḳhud-kushi miri ghurbat se puchhiye
ham kyuun havas-parasti ka ilzam den use
sab aaj apni apni mohabbat se puchhiye
kahte hain kis ko hashr qayamat hai kis ka naam
ham-sakinan-e-shahr-e-qayamat se puchhiye
khulte kahan hain sab pe ye asrar harf ke
ramz-e-suḳhan ko ahl-e-farasat se puchhiye
kyuun vo zaban-daraz bhi ḳhamosh ho gaya
‘shahid’-kamal us ki ra.unat se puchhiye
Leave a Reply