maqsad-e-husn hai kya chashm-e-basirat ke siva
vaj.h-e-taḳhliq-e-bashar kya hai mohabbat ke siva
ḳhun-e-dil thukte phirte hain jahan men sha.ir
kya mila shahr-e-suḳhan men unhen shohrat ke siva
aaj bhi ilm-o-fan-o-sher-o-adab hain pamal
ba-kamalon ko mila kuchh na ihanat ke siva
haath men jin ke ḳhushamad ka hai gadla kashkol
un ko e.azaz bhi mil ja.enge izzat ke siva
raat din ranj hai is baat ka sab ko ḳhaliq
arsa-e-hashr men kya laa.en nadamat ke siva
ye mashinon ki chaka-chaund ye daur-e-alat
is men har chiiz muqaddar hai muravvat ke siva
ghota-zan ham rahe kasrat ke samundar men fuzul
kaun ye pyaas bujha.e tiri vahdat ke siva
kya zamane men diya tu ne aqidat ka ma.aal
ham ko ranj-o-gham-o-andoh-o-musibat ke siva
ham jo apna.en zamane men tavakkul yarab
baab khul ja.enge ham par tiri rahmat ke siva
jab utarti hon sar-e-arsh se ayat-e-junun
kaun ho ḳhaliq-e-ash.ar mashiyyat ke siva
kitne hatim mile ‘gulzar’ zamane men hamen
vo ki har chiiz ke vasif the saḳhavat ke siva
Leave a Reply