Poet
vo chand tha badalon men gum tha
vo aks tha paniyon men gum tha
dastak ki sada to aa rahi thi
main apne hi vahimon men gum tha
chehre pe mohabbaten saji thiin
dil apni hi nafraton men gum tha
miTTi men nami kahan se aati
paani to samundaron men gum tha
darbar men kursiyan saji thiin
har shaḳhs aqidaton men gum tha
us ahd ka kya shumar kiije
jo ahd ka.i ruton men gum tha
insaf ki bhiik kise milti
qanun shahadaton men gum tha
shirin se saja tha qasr-e-ḳhusrav
farhad mohabbaton men gum tha
manzil ka suragh dene vaala
be-nam masafaton men gum tha
Leave a Reply