chamakte chand sitaro zara ḳhayal karo
kabhi to dil se pukaro zara ḳhayal karo
haya ke dhagon men lipTe hue hain ham donon
na.i ruton ke isharo zara ḳhayal karo
giri to TuuT ke bikhrungi duur duur kahin
ai kaghzi se saharo zara ḳhayal karo
sulag raha hai kisi ka firaq tan-man men
idhar na aao baharo zara ḳhayal karo
milan ki aas hai lekin ye kaam na-mumkin
nadi ke donon kinaro zara ḳhayal karo
‘samina’ ashk gira do ye zabt chhoḌo bhi
inhen na dil se guzaro zara ḳhayal karo
Leave a Reply