manzar se udhar ḳhvab ki paspa.i se aage
main dekh raha huun had-e-bina.i se aage
ye ‘qais’ ki masnad hai so zeba hai usi ko
hai ishq sarasar miri dana.i se aage
shayad mire ajdad ko malum nahin tha
ik baagh hai is dasht ki ra.ana.i se aage
sab dekh rahi thi pas-e-divar tha jo kuchh
thi chashm-e-tamasha.i tamasha.i se aage
ham qafiya-paima.i ke chakkar men paḌe hain
hai sinf-e-ghazal qafiya-paima.i se aage
ik din jo yunhi parda-e-aflak uThaya
barpa tha tamasha koi tanha.i se aage
mujh kaghzi kashti pe nazar kijiye ‘azar’
baḌhti hai jo lahron ki tavana.i se aage
Leave a Reply