bhaTak rahi hai andheron men aankh dekhe kya
ruki hai soch ki ab aur aage soche kya
har ek raah hai sunsan har gali ḳhamosh
ye shahr shahr-e-ḳhamoshan hai koi bole kya
bujhi bujhi si tamanna thaki thaki si umiid
ab aur yaas ke sahra men koi chahe kya
hui hai sub.h se kis tarah shaam shaam se sub.h
jo meri jaan pe guzri hai koi samjhe kya
har ek fard hai yaan apni apni soch men gum
javab ḳhud se gurezan saval puchhe kya
Leave a Reply