aur to kuchh na hua pi ke bahak jaane se
baat mai-ḳhane ki bahar ga.i mai-ḳhane se
koi paimana laḌa jab kisi paimane se
ham ne samjha ki pukara gaya mai-ḳhane se
do nigahon ka javani men hai aisa milna
jaise divane ka milna kisi divane se
dil ki duniya men savera sa nazar aata hai
hasraten jaag uThi hain tire aa jaane se
dil ki ujḌi hui halat pe na jaa.e koi
shahr abad hue hain isi virane se
jalva-gar aaj unhen bhi sar-e-mimbar dekha
jin ko dekha tha nikalte hue mai-ḳhane se
dar-o-divar pe qabza hai udasi ‘nazir’
ghar mira ghar na raha un ke chale jaane se
Leave a Reply