ajab hai rang-e-chaman ja-ba-ja udasi hai
mahak udasi hai bad-e-saba udasi hai
nahin nahin ye bhala kis ne kah diya tum se
men Thik-Thak huun haan bas zara udasi hai
main mubtala kabhi hota nahin udasi men
main vo huun jis men ki ḳhud mubtala udasi hai
tabib ne koi tafsil to bata.i nahin
bahut jo puchha to itna kaha udasi hai
gudaz qalb ḳhushi se bhala kisi ko mila
aziim vasf hi insan ka udasi hai
shadid dard ki ru hai ravan rag-e-jan men
bala ka ranj hai be-intiha udasi hai
firaq men bhi udasi baḌe kamal ki thi
pas-e-visal to is se siva udasi hai
tumhen mile jo ḳhazane tumhen mubarak hon
miri kama.i to ye be-baha udasi hai
chhupa rahi ho magar chhup nahin rahi miri jaan
jhalak rahi hai jo zer-e-qaba udasi hai
mujhe masa.il-e-kaun-o-makan se kya matlab
mira to sab se baḌa mas.ala udasi hai
falak hai sar pe udasi ki tarah phaila hua
zamin nahin hai mire zer-e-pa udasi hai
ghazal ke bhes men aa.i hai aaj mahram-e-dard
suḳhan ki oḌhe hue hai rida udasi hai
ajiib tarah ki halat hai meri be-ahval
ajiib tarah ki be majra udasi hai
vo kaif-e-hijr men ab ghaliban sharik nahin
ka.i dinon se bahut be-maza udasi hai
vo kah rahe the ki sha.ir ghazab ka hai ‘irfan’
har ek sher men kya gham hai kya udasi hai
Leave a Reply