har daur men har ahd men tabinda rahenge
ham ahl-e-mohabbat hain daraḳhshanda rahenge
jo naqsh-e-qadam ahl-e-junun chhoḌ ga.e hain
tum laakh miTaoge vo pa.inda rahenge
tum ne vo sitam Dhaa.e hain arbab-e-vafa par
tariḳh ke auraq bhi sharminda rahenge
halat jo maazi men the vo aaj nahin hain
darpesh jo ab hain vo na a.inda rahenge
Dhal ja.ega ik roz tire husn ka suraj
ham aaj bhi tabinda hain tabinda rahenge
rang apna badalta hai zamana to badal le
ham azmat-e-rafta ke numa.inda rahenge
sab nam-o-nishan dahr se miT ja.enge ‘rahi’
kuchh naam hain aise bhi jo pa.inda rahenge
Leave a Reply