phulon men vo khushbu vo sabahat nahin aai
ab tak tire aane ki shahadat nahin aai
mausam tha numaish ka magar aankh na kholi
janan tire zakhmon ko siyasat nahin aai
jo ruuh se azar ki manind lipat jaae
ham par vo ghadi ai shab-e-vahshat nahin aai
ai dasht-e-anal-haq tire qurban abhi tak
vo manzil izhar-e-sadaqat nahin aai
ham log ki hain maaon se bichhde hue bachche
hisse men kisi ke bhi mohabbat nahin aai
ham ne to bahut harf tiri madh men soche
afsos ki sunvai ki naubat nahin aai
larze bhi nahin shahr ke hassas dar-o-bam
dil raakh hue phir bhi qayamat nahin aai
‘sajid’ vo sahar jis ke liye raat bhi roi
aai to sahi hasb-e-zarurat nahin aai
Leave a Reply