Razi Akhtar Shauq
sang hain navak-e-dushnam hain rusva.i hai
ye tire shahar ka andaz-e-pazira.i hai
kitna phailega ye ik vasl ka lamha aḳhir
kya sameToge ki ik umr ki tanha.i hai
kuchh to yaron se mila sang-e-malamat hi sahi
kis ne is shahar men yuun dad-e-hunar paa.i hai
ek patthar idhar aaya hai to is soch men huun
meri is shahr men kis kis se shanasa.i hai
‘shauq’ jis din se charaghan hai ḳhayalon ki gali
jashn sa jashn hai tanha.i si tanha.i hai
Leave a Reply