Ameer Minai
phulon men agar hai bu tumhari
kanton men bhi hogi khu tumhari
us dil pe hazar jaan sadqe
jis dil men hai aarzu tumhari
do din men gulu bahar kya ki
rangat vo rahi na bu tumhari
chatka jo chaman men ghuncha-e-gul
bu de gai guftugu tumhari
mushtaq se duur bhagti hai
itni hai ajal men khu tumhari
gardish se hai mahr-o-mah ke sabit
un ko bhi hai justuju tumhari
ankhon se kaho kami na karna
ashkon se hai aabru tumhari
lo sard hua main nim-bismil
puuri hui aarzu tumhari
sab kahte hain jis ko lailatul-qadr
hai kakul-e-mushk-bu tumhari
tanha na phiro ‘amir’ shab ko
hai ghaat men har adu tumhari
Leave a Reply