akhtar-shirani

Badnam Ho Raha Hun

faryadi-e-jafa-e-ayyam ho raha huun

pamal-e-jaur-e-bakht-e-nakam ho raha huun

sargashta-e-khayal-e-anjam ho raha huun

basti ki ladkiyon men badnam ho raha huun

bad-nam ho raha huun

salma se dil laga kar

basti ki ladkiyon men badnam ho raha huun

salma se dil laga kar salma se dil laga kar

us hur-vash ke gham men duniya-o-din ganva kar

hosh-o-havas kho kar sabr-o-sukun luta kar

baithe bithae dil men gham ki khalish basa kar

har chiiz ko bhula kar

salma se dil laga kar

basti ki ladkiyon men badnam ho raha huun

kahti hain sab ye kis ki tadpa gai hai surat

salma ki shayad is ke man bha gai hai surat

aur us ke gham men itni murjha gai hai surat

murjha gai hai surat kumhla gai hai surat

sanvla gai hai surat

salma se dil laga kar

basti ki ladkiyon men badnam ho raha huun

panghat pe jab ki saari hoti hain jama aa kar

gagar ko apni rakh kar, ghunghat utha utha kar

ye qissa chhedti hain mujh ko bata bata kar

salma se baten karte dekha hai is ko ja kar

ham ne nazar bacha kar

salma se dil laga kar

basti ki ladkiyon men badnam ho raha huun

raton ko giit gaane jab mil kar aati hain sab

talab ke kinare dhumen machati hain sab

jangal ki chandni men mangal manati hain sab

to mere aur salma ke giit gaati hain sab

aur hansti jaati hain sab

salma se dil laga kar

basti ki ladkiyon men badnam ho raha huun

kheton se lautti hain jab din chhupe makan ko

tab raste men baham vo meri dastan ko

dohra ke chhedti hain salma ko meri jaan ko

aur vo haya ki maari si leti hai zaban ko

ki chhede is bayan ko

salma se dil laga kar

basti ki ladkiyon men badnam ho raha huun

kahti hai rahm kha kar yuun ek mah-e-talat

ye shahri naujavan tha kis darja khub-surat

ankhon men bas rahi hai ab bhi vo pahli rangat

do din men aah kya hai kya ho gai hai halat

allah teri qudarat

salma se dil laga kar

basti ki ladkiyon men badnam ho raha huun

us shama-ru ka jab se parvana ban gaya huun

basti ki ladkiyon men afsana bin gaya huun

har mah-vash ke lab ka paimana ban gaya huun

divana ho raha huun divana ban gaya huun

divana ban gaya huun

salma se dil laga kar

basti ki ladkiyon men badnam ho raha huun

un ki zaban pe meri jitni kahaniyan hain

kya janen ye ki dil ki sab mehrbaniyan hain

kam-sin hain be-khabar hain uthti javaniyan hain

kya samjhen gham ke hathon kyuun sar-giraniyan hain

kyuun khun-fishaniyan hain

salma se dil laga kar

basti ki ladkiyon men badnam ho raha huun

har ik ke rahm ka yuun izhar ho raha hai

bechare ko ye kaisa azar ho raha hai

dekhe to koi jaane bimar ho raha hai

kis darja zindagi se bezar ho raha hai

na-char ho raha hai

salma se dil laga kar

basti ki ladkiyon men badnam ho raha huun

ik puchhti hai aa kar tum be-qarar kyuun ho

kuchh to hamen batao yuun dil-figar kyuun ho

kya rog hai kaho to tum ashk-bar kyuun ho

divane kyuun hue ho divana vaar kyuun ho

ba-hal-e-zar kyuun ho

salma se dil laga kar

basti ki ladkiyon men badnam ho raha huun

jaun shikar ko gar ba-hamrahan-e-sahra

kheton se ghurti hain yuun dukhtaran-e-sahra

bijli ki raushni ko jaise miyan-e-sahra

tarik shab men dekhen kuchh ahuvan-e-sahra

hairat kushan-e-sahra

salma se dil laga kar

basti ki ladkiyon men badnam ho raha huun

ik shokh chhedti hai is tarah paas aa kar

dekho vo ja rahi hai salma nazar bacha kar

sharma ke muskura kar anchal se munh chhupa kar

jaao na pichhe pichhe do baten kar lo ja kar

kheton men chhup chhupa kar

salma se dil laga kar

basti ki ladkiyon men badnam ho raha huun

goya hamen hasad se kuchh naznin nigahen

salma ki bha gai hain kyuun dil-nashin nigahen

un se zyada dilkash hain ye hasin nigahen

al-qissa ek dil hai sau khashmagin nigahen

shauq afrin nigahen

salma se dil laga kar

basti ki ladkiyon men badnam ho raha huun

ik shokh taaza darad sasural se ghar aa kar

sakhiyon se puchhti hai jis dam mujhe bata kar

ye kaun hai to zalim kahti hain muskura kar

tum is ka haal puchho salma ke dil se ja kar

ye giit use suna kar

salma se dil laga kar

basti ki ladkiyon men badnam ho raha huun

More Poems

Leave a Comment