sab ik na ik sarab ke chakkar men rah gae
kya pher aadmi ke muqaddar men rah gae
kya dard-e-mushtarak tha zamir-e-sukut men
kho kar jo ham udaas se manzar men rah gae
ye dasht-e-zist aur ye khara-tarashiyan
jalve hunar ke sina-e-azar men rah gae
dekha sanam-kadon ko to aksar hua khayal
vo naqsh-e-javedan the jo patthar men rah gae
darvaze va the phir bhi ajab be-dari si thi
ham khud asiir ho ke khule ghar men rah gae
yuun bhi gham o nashat ka qissa na ho tamam
insan dhal ke yaas ke paikar men rah gae
milta nahin koi sar-e-shorida ab ‘sahar’
patthar hi bas dayar-e-sitamgar men rah gae
Leave a Reply