sunta nahin hai dil to us bevafa ki baten
kal par uTha ke rakkho us bevafa ki baten
dil hai udaas ab to is tazkire ko badlo
kyon ho musir ki sun lo us bevafa ki baten
aaj us ne hai rulaya ham ko bahut sataya
ham se na karna ab to us bevafa ki baten
TuuTe hain ḳhvab mere ab dafn in ko kar do
dohra bhi kyon rahe ho us bevafa ki baten
ham ko sameTna hain ab dil ki kirchiyan bhi
toḌa hai dil ko dekho us bevafa ki baten
us ki juda.i kaise ab ham ‘dua’ sahenge
kuchh der phir se kar lo us bevafa ki baten
Leave a Reply