Khalid Malik Sahil
tu tishnagi ki aziyyat kabhi furat se puchh
andheri raat ki hasrat andheri raat se puchh
guzar rahi hai jo dil par vahi haqiqat hai
gham-e-jahan ka fasana gham-e-hayat se puchh
main apne aap men baiTha huun be-ḳhabar to nahin
nahin hai koi ta.alluq to apni zaat se puchh
dukhi hai shahr ke logon se bad-mizaj bahut
jo puchhna hai mohabbat se ehtiyat se puchh
tu apni zaat ke andar bhi jhank le ‘sahil’
zamin ka bhed kisi roz ka.enat se puchh
Leave a Reply