Raushni Le Ke Kahin Chand Kahin Taron Se

Poet

raushni le ke kahin chand kahin taron se

ham bhi guzre the kabhi vaqt ke bazaron se

zindagi tujh se tire gham se to inkar nahin

haan magar lazzat-e-gham chhin ga.i gham-ḳhvaron se

azmat-e-rafta ki miTti hui tasvir hain ham

ham ko laTka.iyē girti hui divaron se

is se pahle ki chhiḌe zikr-e-vafa pyaar ki baat

mashvara kar lo zara vaqt ki sarkaron se

chand jis vaqt utar aata hai paimanon men

mai-kade baat kiya karte hain mai-ḳhvaron se

ham ko be-dam bhi bik jaane ka fan aata hai

baat kahne ki nahin hai ye ḳharidaron se

vahi tanha.i ki baten hain vahi zaat ke gham

mujh ko shikva hai mire duur ke fankaron se

abr-e-rahmat ko liye apni nazar men ‘ḳhusrav’

ham bhi to dasht se guzre kabhi kohsaron se