Mansoor Khushtar
tum ko apna shumar karte hain
dida-o-dil nisar karte hain
un ka mashq-e-sitam rahe jaari
jin ko ham dil se pyaar karte hain
ham se to bad-guman rahe to rahe
ham tira e.atibar karte hain
ham banate hain phuul kanTon ko
aap phulon ko ḳhaar karte hain
aap ko shauq hai to maz.hab ham
ishq ka iḳhtiyar karte hain
ham juda tum se rah nahin sakte
rishta phir ustuvar karte hain
baḳhshi ‘ḳhushtar’ ko dard ki daulat
shukr-e-parvardigar karte hain
Leave a Reply