Alam Khursheed
kyuun ankhen band kar ke raste men chal raha huun
kya main bhi rafta rafta patthar men Dhal raha huun
charon taraf hain shole ham-sa.e jal rahe hain
main ghar men baiTha baiTha bas haath mal raha huun
mere dhuen se meri har saans ghuT rahi hai
main raah ka diya huun aur ghar men jal raha huun
ankhon pe chha gaya hai koi tilism shayad
palken jhapak raha huun manzar badal raha huun
tabdiliyon ka nashsha mujh par chaḌha hua hai
kapḌe badal raha huun chehra badal raha huun
is faisle se ḳhush hain afrad ghar ke saare
apni ḳhushi se kab main ghar se nikal raha huun
in pattharon pe chalna aa ja.ega mujhe bhi
Thokar to kha raha huun lekin sambhal raha huun
kanTon pe jab chalunga raftar tez hogi
phulon bhari ravish par bach bach ke chal raha huun
chashme ki tarah ‘alam’ ash.ar phuTte hain
koh-e-giran ki surat men bhi ubal raha huun
Leave a Reply