jo yuun aap bairun-e-dar ja.enge
ḳhuda jaane kis kis ke ghar ja.enge
shab-e-hijr men ek din dekhna
agar zindagi hai to mar ja.enge
abas ghar se apne nikale hai tu
bhala ham tujhe chhoḌ kar ja.enge
musafir hain lekin nahin jante
kahan se ham aa.e kidhar ja.enge
tamanna men bose ki kahta hai ji
badan se nikal bhi agar ja.enge
tu hai ek-dam aur hazaron umiid
labon pe koi dam Thahar ja.enge
ba-hurmat nibhi ab talak jis tarah
huzur itne din bhi guzar ja.enge
Leave a Reply