be-hijab aap ke aane ki zarurat kya thi
yuun mire hosh uḌane ki zarurat kya thi
ham se kahna tha Dubo dete safina apna
itne tufan uThane ki zarurat kya thi
jab se aaya huun yahan mohr-ba-lab baiTha huun
mujh ko mahfil men bulane ki zarurat kya thi
apne kirdar-o-amal par jo bharosa hota
aap ke naaz uThane ki zarurat kya thi
yuun bhi ho sakte the abad tire virane
ham ko divana banane ki zarurat kya thi
ashk-e-ḳhun ba.ad men ‘sarshar’ bahane the agar
ḳhun-e-ushshaq bahane ki zarurat kya thi
Leave a Reply