Zia Faruqi
zamin pe maktab-e-adam ka ik nisab hai ishq
likhi ga.i jo azal men vahi kitab hai ishq
hudud-e-zat ke andar bhi shor-o-shar us ka
hudud-e-zat ke bahar bhi iztirab hai ishq
junun ki tah se jo ubhre to gauhar-e-nayab
havas ki mauj pe aa.e to ik habab hai ishq
kisi saval ki surat hai ka.enat tamam
aur is saval ka asan sa javab hai ishq
sameT len jo nigahen to husn-e-laila tak
bikher den jo faza men to be-hisab hai ishq
varaq varaq pe hai bikhra mire vajud ka rang
ye kis ke haath ki likkhi hui kitab hai ishq
faza-e-laila-e-shab men hai raushni us ki
‘ziya’-e-naḳhvat-e-shirin ka aftab hai ishq
Leave a Reply