Ishrat Afreen
bhuuk ki kaḌvahaT se sard kasile honT
ḳhuun ugalte sukhe chaTḳhe piile honT
TuuTi chuḌi ThanDi laḌki baghi umr
sabz badan pathra.i ankhen niile honT
suuna angan tanha aurat lambi umr
ḳhali ankhen bhiga anchal giile honT
kachche kachche lafzon ka ye niila zahar
chhu jaa.e to murakh to bhi chhile honT
zahar hi mangen amrit-ras ko munh na laga.en
baghi ziddi vahshi aur haTile honT
aisi banjar baten aise kaḌve bol
aise sundar komal surḳh rasile honT
itna bologi to kya sochenge log
rasm yahan ki ye hai laḌki si le honT
Leave a Reply