na nikla munh se kuchh nikli na kuchh bhi qalb-e-muztar ki
kisi ke samne main ban gaya tasvir patthar ki
khuda se kyuun na mangun vaah main bandon se kya mangun
mujhe mil jaegi jo chiiz hai mere muqaddar ki
tasavvur chahiye ai shaikh sab ka ek iima hai
sada hai parda-e-naqus men allahu-akbar ki
dil-e-rahat-talab ko qabr men kya be-qarari hai
mujhe ghabrae deti hai udasi is nae ghar ki
kaleje men hazaron daagh dil men hasraten lakhon
kamai le chala huun saath apne zindagi bhar ki
sambhal kar dekhna araishon ke baad aina
ye aina nahin hai ab ye tukde hai barabar ki
mire ashar ‘shair’ daagh o aasif jaah se puchho
ki shaah o jauhri hi jante hain qadr gauhar ki
Leave a Reply