puchhen vo kaash haal dil-e-be-qarar ka
ham bhi kahen ki shukr hai parvardigar ka
lazim agar hai shukr hi parvardigar ka
phir kya ilaaj gardish-e-lail-o-nahar ka
sayyad bhi pahunch gaya gul-chi bhi baagh men
ai ham-safir aa gaya mausam bahar ka
tadbir kya ho sabr-o-shakeb-o-qarar ki
vo tund-ḳhu hai bas ka na dil iḳhtiyar ka
kyun-kar miTe nadamat-e-iz.har-e-arzu
aalam nazar men hai nigah-e-sharmsar ka
qanun kis ne badla hai qudrat ka shaiḳh-ji
daaru hai ab bhi mai hi gham-e-rozgar ka
un namiyon ke hashr se ibrat-pazir ho
baaqi nahin nishan bhi jin ke ghubar ka
rakkhega be-qarar tumhen bhi tamam umr
marna taḌap taḌap ke kisi be-qarar ka
be-laus ho havas se agar ishq ai ‘vafa’
hai zikr-e-yar men bhi maza vasl-e-yar ka
Leave a Reply