Ramz Azimabadi
na gul khile na shagufon pe tazgi aa.i
ḳhizan ke ba.ad chaman men bahar bhi aa.i
hujum-e-gham men kahan fursat-e-tabassum bhi
zara bhi yaad nahin kab mujhe hansi aa.i
koi bhi jada-e-nau ḳhud-baḳhud nahin banta
ye baat samjhoge jis roz kaj-ravi aa.i
main ik shajar huun uThate hain fa.eda sab log
na dushmani mira sheva na be-ruḳhi aa.i
hamare saath hamesha ye hadisa guzra
badal ke bhes raqabat ka dosti aa.i
zamin to ḳhud hi chamakta hua sitara hai
na jaane kaise yahan tirgi chali aa.i
gham-e-hayat salamat tujhe ḳhuda rakkhe
tire sabab gham-e-janan men puḳhtagi aa.i
hazar baar suni hausla-shikan baten
miri jabin pe na koi shikan kabhi aa.i
kali ko kaun tabassum se rok sakta hai
saval ye hai ki phulon ko kyuun hansi aa.i
andheri raat ka manzar hamesha rahta hai
kiran ujale ki ghar men kabhi kabhi aa.i
ḳhuda ke naam pe mardum-kushi rahi jaari
lahuluhan hi aa.i hai jo sadi aa.i
Leave a Reply