Pirzada Qasim

Ek Se Silsile Hain Sab Hijr Ki Rut Bata Gai

ek se silsile hain sab hijr ki rut bata gai

phir vahi subh aaegi phir vahi shaam aa gai

mere lahu men jal uthe utne hi taza-dam charagh

vaqt ki sazishi hava jitne diye bujha gai

main bhi ba-pas-e-dostan apne khilaf ho gaya

ab yahi rasm-e-dosti mujh ko bhi raas aa gai

tund hava ke jashn men log gae to the magar

tan se koi qaba chhini sar se koi rida gai

dil-zadagan ke qafile duur nikal chuke tamam

un ki talash men nigah ab jo gai to kya gai

akhir-e-shab ki dastan aur karen bhi kya bayan

ek hi ah-e-sard thi saare diye bujha gai

Leave a Comment