na puchh ai mire gham-khvar kya tamanna thi
dil-e-hazin men bhi abad ek duniya thi
har ik nazar thi hamare hi chak-daman par
har ek saat-e-gham jaise ik tamasha thi
hamen bhi ab dar o divar ghar ke yaad aae
jo ghar men the to hamen arzu-e-sahra thi
koi bachata hamen phir bhi duub hi jaate
hamare vaste zanjir mauj-e-dariya thi
baghair samt ke chalna bhi kaam aa hi gaya
fasil-e-shahr ke bahar bhi ek duniya thi
tilism-e-hosh-ruba the vo manzar-e-hasti
faza-e-dida-o-dil jaise khvab aasa thi
koi rafiq-e-safar tha na rahbar koi
junun ki raah men ‘gulnar’ jada-paima thi
Leave a Reply