ham jo bichhḌe hain to ankhon ko bhigote hi rahe
moti palkon pe hama-vaqt pirote hi rahe
ham to so.e the ghani niind ki chadar oḌhe
ḳhvab kya dekh liya aisa ki rote hi rahe
ya to vo de na sake dard ke lamhon ko ḳhiraj
ya na.e zaḳhm mile hain jinhen dhote hi rahe
is juda.i ki siyah-rat ne sone na diya
ham tiri yaad ke lamhon ko pirote hi rahe
tum ga.e vaqt ke manind rahe ḳhush ‘manzar’
bar-e-gham log na.i nasl ke Dhote hi rahe
Leave a Reply