maut jab mere nazdik aane lagi
zindagi phir mujhe kyon lubhane lagi
ek tu kya gaya hai jahan se mire
jo bhi thi aarzu sab Thikane lagi
ḳhvab men bhi bichhaḌne lage mujh se tum
niind bhi aa ke mujh ko Darane lagi
tu to apni thi meri tujhe kya hua
zindagi tu bhi ab azmane lagi
dhuup par main koi tabsira kya karun
chhanv bhi ab to mujh ko jalane lagi
jab bhi tanha.iyan mujh pe haavi hui
lafz kaghaz pe phir se sajane lagi
zindagi bhar koi saath deta nahin
main ‘siya’ ḳhud ko yuun varghalane lagi
Leave a Reply