ḳhud ko paane ki talab men aarzu us ki bhi thi
main jo mil jaata to us men aabru us ki bhi thi
zindagi ik dusre ko DhunDne men kaT ga.i
justuju meri bhi dushman thi adu us ki bhi thi
meri baton men bhi talḳhi thi sam-e-tanha.i ki
zahr-e-tanha.i men Duubi guftugu us ki bhi thi
vo gaya to karvaTen le le ke pahlu thak ga.e
kis tarah sota mire sanson men bu us ki bhi thi
raat bhar ankhon men us ka marmarin paikar raha
chandni ke jhilmilane men numu us ki bhi thi
ghar se us ka bhi nikalna ho gaya aḳhir muhal
meri rusva.i se shohrat ku-ba-ku us ki bhi thi
main hua ḳha.if to us ke bhi uḌe hosh-o-havas
meri jo surat hui vo hu-ba-hu us ki bhi thi
kuchh mujhe bhi sidhe-sadhe raston se bair hai
kuchh bhaTak jaane ke baa.is justuju us ki bhi thi
vo jise saare zamane ne kaha mera raqib
main ne us ko ham-safar jaana ki tu us ki bhi thi
dasht-e-furqat ka safar bhi aḳhirash tai ho gaya
aur kuchh din saath deta aarzu us ki bhi thi
baat baḌhne ko to baḌh jaati bahut lekin ‘nazar’
main bhi kuchh kam-go tha chup rahne ki ḳhu us ki bhi thi
Leave a Reply