ham shaad hon kya jab tak azar salamat hai
sar phoḌ chuke phir bhi divar salamat hai
aaya tire honTon par elan-e-junun kyuun kar
jab tere gareban ka har taar salamat hai
andaz dikha.e hain kya shoḳhi-e-tiflan ne
is shahr men ab kis ki divar salamat hai
luTta hai to luT jaa.e sukh-chain faqiron ka
kya fikr tujhe tera pindar salamat hai
ik sang ke ha.Tne se ḳhush-fahm na ho itna
mat bhuul ki raste men kohsar salamat hai
‘gulzar’ hamen dekho kashti ko Dubo kar bhi
kis faḳhr se kahte hain patvar salamat hai
Leave a Reply