Akhtar Muslimi
naale mire jab tak mire kaam aate rahenge
ai zauq-e-nazar vo lab-e-bam aate rahenge
ai zauq-e-talab tu jo salamat hai to kya gham
lab tak mire ḳhud jaam pe jaam aate rahenge
dil zinda agar ho to phir ai ziist ke talib
har gaam pe jiine ke payam aate rahenge
manzil ki tamanna hai to Thukra ke nikal ja
sayyad liye dana-o-dam aate rahenge
kha jaao na dhoka kahin manzil ke guman par
raste men kuchh aise bhi maqam aate rahenge
‘aḳhtar’ agar abad rahe gul-kada-e-dil!
phir is men to kuchh mast ḳhiram aate rahenge
Leave a Reply