Anees Ansari
naam tera bhi rahega na sitamgar baaqi
jab hai fir.aun na changez ka lashkar baaqi
apne chehron ko siyahi men chhupane vaalo
nok-e-neza pe hai suraj sa koi sar baaqi
tere virse pe hain ghasib ki uqabi nazren
ghaflaton se nahin rahte ye javahar baaqi
ik sadaf sat.h-e-samandar pe baha jaata hai
aur sahil pe nahin ek shanavar baaqi
ek saf hon to banen siisa pila.i divar
hon adu ke liye rahen na kahin dar baaqi
qadr kam hoti hai taqsim jo hota hai adu
hasil-e-jam.a men barakat hai barabar baaqi
jaal phir laaya hai sayyad phansane ke liye
mil ke uḌ jaa.en parinde na rahe Dar baaqi
zulm se sar ko na Takra.en to phir sajda karen
haan pata hai ki dar hoga na kahin sar baaqi
ham shahidon ko kabhi murda nahin kahte ‘anis’
rizq jannat men mile shaan yahan par baaqi
Leave a Reply