manzar ko kisi tarah badalne ki dua de
de raat ki ThanDak ko pighalne ki dua de
ai sa.at-e-viran ke be-ḳhvab farishte
ab chiḳh ko siine se nikalne ki dua de
patte ko parindon ki panahon pe laga de
peḌon ko yahan phulne phalne ki dua de
paḌh aisa vazifa ki ye kohsar na ujḌe
chashmon ko pahaḌon se ubalne ki dua de
ab toḌ takanon ke takalluf se ta.alluq
pazhmurda tabi.at ko phisalne ki dua de
afaq ki divaron ki aghosh ko va kar
ab matl.a-e-maujud ko khulne ki dua de
ham bhuul hi jaa.en na kisi shakl-e-sahar ko
ab shab ko kisi taur se Dhalne ki dua de
Leave a Reply