honi huun kisi haal men Talne ki nahin huun
main vaqt ke hathon se nikalne ki nahin huun
ye baat sahi TuuT ke bikhri to bahut huun
ye baat ghalat hai ki sambhalne ki nahin huun
lagta hai jaḌen phail ga.i hain miri tujh men
ukhḌi to kahin phulne-phalne ki nahin huun
pahchan zamane men yahi hai miri ab main
kirdar kahani men badalne ki nahin huun
main huun pas-e-manzar ki bhi takmil men shamil
bas is liye manzar se nikalne ki nahin huun
be-ḳhauf jo sach bolta rahta hai hamesha
vo aa.ina apna main badalne ki nahin huun
vahshat hai bahut ḳhuun men ‘nusrat’ isi Dar se
sahra ki taraf ja ke Tahalne ki nahin huun
Leave a Reply