tasneem-abidi

Phul Murjha Jaenge Kante Lage Rah Jaenge

phuul murjha jaenge kante lage rah jaenge

har khushi mit jaegi bas dukh hare rah jaenge

lala-zaron kohsaron men tumhen Dhundenge ham

yaad ke be-nam se kuchh silsile rah jaenge

tum qarib ho kar bhi itni duur hote jaate ho

qurbaton ke darmiyan bas fasle rah jaenge

tasfiya mabain apne ho na paega kabhi

ham ana ki aag men jalte hue rah jaenge

azm ki shamen umidon ki har ik qindil ko

ham bujha kar zulmat-e-shab men khade rah jaenge

surma-o-ghaza ke badle dhuul jamti jaegi

sab ke chehre gard-e-qismat se ate rah jaenge

sab chale jaenge ik be-nam manzil ki taraf

ghar ki takhti ki jagah katbe lage rah jaenge

More Poems

Leave a Comment