Poet
danton se jabki us gul-e-tar ke daba.e honTh
bola ki sahab apne se samjho para.e honTh
us ghairat-qamar ke agar dekh paa.e honTh
la.al-e-yaman bhi rashk se apna chaba.e honTh
phulon se us ke jabki chaman men mila.e honTh
nazuk ziyada rag se saman ke bhi paa.e honTh
samjha main ḳhizr-e-chashma-e-ab-e-hayat huun
honThon se mere us ne jo apne mila.e honTh
manga jo bosa yaar se main ne shab-e-visal
az-ḳhud maze men aa ke mire kaaT khaa.e honTh
kya kya sifat zaban se sausan ki bhi suni
mal kar misi chaman men jo us ne dikha.e honTh
surḳhi ne un labon ki kiya ashiqon ka ḳhuun
laali jami jo paT ke to kya rang laa.e honTh
honThon men daab kar jo gilauri di yaar ne
kya daant piise ghairon ne kya kya chaba.e honTh
paani bhar aa.e misriyon ke munh men vaqt-e-did
shirin ki raal Tapke jo vo dekh paa.e honTh
dam aa gaya labon pe ye Dahkaya yaar ne
sau baar paas honThon ke la kar haTa.e honTh
shirin-labi to dekhna vo neshkar bani
quliyan ki nai se us ne jo apne laga.e honTh
bose dahan ke is ke nahin bhulte ‘qalaq’
kahta huun haa.e daant kabhi gaah haa.e honTh
Leave a Reply